Os Diaples d'a Uerba.

.^.boton

¿Quí somos Os Diaples?

Os diaples d'a Uerbasomos una asociación cultural de Zaragoza, que en base a o voluntariau femos spectaclos teatralizaus con mosica, fuego y pirotecnia. Partindo d’as tradicions y mitolochías aragonesas, y rescatando personaches como os diaples, diaplerons, bruixas, bruixos, chigants, lacuercos y atras bichas.

“Chugamos con o mal pa fer un bien que siga mas divertiu”

Foto de familia dimpúes d’o bolo en Pilars'16.

Somos voluntarias de todas as edatz, y a principal motivación ye a de pasar-lo bien y colaborar pa levar o grupo, os suyos spectaclos y actuacions an que se reclame u siga menester.

Pa disfrutar y pasar buens ratos amenizando as fiestas y celebracions.


Diaples somos: los que fueron, los que son y los que serán.

¿Qué son os diaples?

Figura mitolochica d’a tradición aragonesa, sobre tot d’a zona d’o Pirineu, que representa a uns chicotz sers, diapletz, menutos u folletz, que no paran de fizconiar y de fer cosas sin aturar.

O diaplerón ye a figura gran, que porta a os diaples en un canyuto, qui puet fer servir a bell lugarenyo pa o suyo reto personal.

Os diaples que viven adintro d’o canyuto pueden estar liberaus, y farán todas as fainas que se les indique. Pero si no se les manda garra quefer a suya zocega puet acabar con l’amo d’o canyuto, quedando periglosament liberaus pa fer toda mena de fizconeyos y drezas.

Atros sers mitolochicos

  • Diaplerons

  • Bruixas y bruixons

  • Encantarias

  • Fadas

  • Chigans

  • Homes Granizos

  • Lacuercos;
    cullebra cerruda que se colaba en as cunas pa tetar d’a mai mientres conteneba os plantos d’o ninón enganyau con a coda d’a bicha en a suya boca. Diz que plegaban a morir ingueniosos y pa detectar-lo rodiaban as cunas de cenisas pa veyer o rastro d’o ser.

    Historia d'o grupo.

    Os Diaples d’a Uerba naix d’una manera extranya. En primeras surte a ideya d’animar un carnaval en Zaragoza, con diaples tirando carruchas (pirotecnia) a lo largo d’o desfile carnavalenco. A l’atro anyo una colla de chent s’achunta pa o Carnaval de Sant Chuan de Plan con un argumento de manifiesto en cuentra d’a linia d’alta tensión Aragón – Cazaril. Aquí s’uniforman, esdevenindo o vestuache que mas entabant levará o grupo. Rondaría l’anyo 1991.

    Esta colla de chent que fa parte de Ligallo de Fablans de l’Aragonés veyioron una manera de subvencionar l’asociación y se constituye como colla Diaples d’a Uerba. A suya fin ye a de promocionar costumbres y tradicions aragonesas (luenga aragonesa, bailes, mosica, palotiaus…). Pa ixo se desfiende una cultura de fuego en un guión que en primeras yera una luita cuentra as inchusticias, atendendo a tot aquell que pediba colaboración en manifestacions y protestas. "Cremando inchusticias".

    A primers de 2003 s’independiza de l’asociación per diferencias d’opinions y en marzo se constituye como asociación sin animo de lucro Os Diaples d´a Uerba. A nuestra independencia nos sirve pa prener decisions sin haber de dar explicacions debant de dengún y con o dreito d’opinión de totz os integrants, ya que treballamos baixo o voluntariau y sin garra obligación, nomás compromís per parte de todas, funcionando de manera asembleyaria y horizontal.

    Seguimos con os mesmos intereses que quan empecipiemos, siempre mirando-nos enta debant y creando nuevas perspectivas (estudiando, investigando y aduyando a totz os que piden d’a nuestra colaboración). A fin d’o grupo ye que tot o mundo disfrute, como nusatras lo femos en os nuestros spectaclos, mirando d’arribar ta totz os puestos, sigan grans u chicotz, entregando o nuestro esprito diaplenco pa apegar a tot qui s’acerca. A nuestra anglucia ye a d’un mundo millor pa todas, pero esto ye un imposible y nos aconhortamos con crear una fiesta an que poder dar-nos a conoixer, y como dengún no ye profeta en a suya tierra daremos lo que podamos y recibiremos con goyo tot lo que nos den, per eixemplo una riseta.

    O grupo a día de hue ha cambiau, evolucionau, unas se’n van, atras tornan, nuevas i participan... Ye un ente que sobrevive y mira d’adaptar-se a l’entorno que lo rodeya. Pero a borina y a zambra son guaranciadas.

    Diaples; una gran familia.


    Existen atros grupos de diaples, diablets, diablos, diables y dimonis...

    Conoixemos atros grupos con os que hemos teniu contacto, hemos colaborau y disfrutau d’os suyos spectaclos.

    Adintro d'Aragón...

    • Diaples d'a Madalena
    • Os diaplerons d'o lugar
    • Diablets de La Freseneda
    • Diablos de La Portellada
    • Diables de Val de Robres

    atros puestos

    • Diables de Lleida
    • Diables de l'Onyar, de Girona
    • Diables de Nou Barris, Barcelona
    • Dimonis Fotem-li foc, de Alcanar
    • Diabmonis de La Rapita
    • Diables de Castelló
    • Dimonis de La Plana
    • Els Dimonis de Morella